Што накінуць на шыю?

Зараз сэсія і ёсць некалькі варыянтаў…

Пагаворым пра розныя ўпрыгожванні. Самым старым з’яўляецца, канешне, шыйная хустка. Насілі іх раней мужчыны ў асноўным як абмотку, каб шыя не мылілася аб вопратку ці кірасу і не выпальвалася на сонцы. Упрыгожваннем шыйная хустка стала пасля таго, як адзін з Людовікаў, уражаны мужнасьцю і зухваласьцю харватаў, якія тады змагаліся з туркамі і прыехалі ў Парыж на парад, павязаў сабе на іх манер кавалак тканіны. Пасля французкага двара мода распаўсюдзілася па Еўропе. У шматлікіх мовах гальштук дагэтуль называецца краватам. Рознага кшталту манішкі, банты, шыйныя хусткі панавалі ў ХІХ ст., але з усяго гэтага багацця ў пачатку ХХ ст. засталіся толькі хусткі, гальштукі і матылі.

Гальштукі-матылі вяжуцца да смокінгаў, але нешта я ня бачыў на-жыўца джэнтэльменаў і месцаў для свецкіх раўтаў. Шыйныя хусткі былі і застаюцца спецыфічнай формай выгалення. Толькі раней іх насілі каўбоі, каб пыл ад статкаў не забіваў лёккія, ня жэрлі паразіты і шыя не выпальвалася, а зараз – багема. Але звярніце ўвагу, што вяжуцца яны звычайна простым вузлом на кароткія шыі і пасуюць да неафіцыйнай вопраткі. Звычку насіць хусткі, як клубны знак, ад амерыканскіх скаўтаў запазычылі савецкія піянеры. Модным леташнім дэмісезонным мужскім аксэсуарам з’яўляюцца псеўдаарабскія шалікі (характэрныя белая аснова ўсіх і для кожнай нацыі краткі ў свой колер).

Ці то з амерыканскіх каўбойскіх хустак і капялюшных матузкоў, ці то з брытанскіх фэнскіх шалікаў, развязаных матылёў і, відаць, у выніку масонскай змовы :), узнік найбольш папулярны і статусны прадмет мужчынскага гарнітура – гальштук. На сярэднем захадзе ЗША існуе асобная форма гальштука – тэхаска. Скураны матузок перакідваецца праз шыю і падганяецца пад каўнер засцёжкай з каштоўных металаў. У пачатку ХХ ст. на Беларусі былі папуляныя гальштукі-рэгаты – на гумку з замочкам чаплялася адразу завязаны ў вузел гальштук. Найбольш папулярным на сёння з’яўляецца т.зв. «класічны» гальштук. З ХІХ ст. яны маюць форму да якой мы прызвычаіліся – шырокую ці вузкую. Складваюцца яны з цэлага кавалку тканіны. Лепшыя гандлёвыя маркі брытанскія і італьянскія, яны альбо вяжуцца ўручную, або ткуцца на станках звычайна з натуральнага шоўку (ядваба), кашэміру, воўны. Танныя, якіх у нас большасць, са штучных тканін і поліэстэра.

Гальштук гумарысты называюць паказальнікам таго, што хаваецца ў мужчыны ў тым месцы, куды той скіраваны сваёй стрэлкай. Ён сведчыць аб вашым гусце і статусе. Ён з’яўляецца адным з нешматлікіх дазволеных мужчынам спосабам упрыгожвання ў бізнэс-касцюме. Гальштук, гадзіннік, запанкі, пас, пантофлі і адно кальцо – вось набор джэнтэльмена. Гальштукі не апранаюць на кашулі з кароткім рукавом. Кашуля павінна быць альбо аднакаляровай, альбо ў паску, бо амаль немагчыма падабраць штосьці стасоўнае да тканіны ў краткі. Паскі і каларыстыка гальштука па-вінны пасаваць да фарбаў кашулі і гарнітура. Гальштукі завязваюць так, каб даўгі і шырокі канец даходзіў недзе да спражкі паса. Вузел на працы падцягваецца да ўпора ў версе каўнера, але не збіваецца ў камок. А калі адпачываеце, то расшпільваеца гузік кашулі і вузел прыспускаецца, або гальштук увогуле здымаецца.

Звычайна дзелавы гальштук падбіраецца ў колер касцюма ў шэрым ці чорным адценні. Разнакаляровыя гальштукі пачаліся з таго, што ў пэўны час у англасаксонскім свеце стала модна набываць шыйныя ленты ва ўніверсітэцкіх колерах, звычайна монатонныя. Калі б у нас была такая традыцыя, то мы, як ПДУшнікі, павінны былі б насіць блакітныя і белыя паскі. Так ці іначай, асноўныя сёлетнія расфарбоўкі гэта чырвоныя, сінія, жоўтыя паскі. Арнаментыка нашыйных твораў вельмі разнастайная, галоўнае, каб вам падабалася, колеры стасаваліся паміж сабой і не былі рэзкімі. З малюнкамі на гальштуку, асабліва ў мульцяшным і гавайскім стылі, асцярожна. Хай за вас крычаць вашыя справы, а не тканы пас на горле.

Кожны са спосабаў завязвання гальштукаў – гэта асобная гісторыя. Найбольш распаўсюджаныя англасаксонскія арыстакратычныя віндзар, прат і чацвяртны. Ну а як вязаць вузлы – шукайце малюнкі ў Інтэрнэт. Будзьце прыгожыя і дыхайце поўнымі грудзямі! Лета ў гора-дзе!

Воўж Олдскулер