Юрась Барысевіч

Пісьменнік, мастак, тэарэтык мастацтва.

Нарадзіўся ў 1966 годзе ў Менску. Пасьля службы ў войску вывучаў рамана-германскую філялёгію ў Менскім дзяржаўным лінгвістычным унівэрсытэце і выяўленчае мастацтва ў асьпірантуры пры Нацыянальнай акадэміі навук. Працаваў перакладчыкам, журналістам, рэдактарам у НВА «Інтэграл», газэце «Культура», Менскім інстытуце кіраваньня, часопісах «Мастацтва» і The Green Cross Optimist. Аўтар кніг «Цела і тэкст» і «Alter nemo», ідэоляг беларускага літаратурнага авангарду. Удзельнік мастацкіх выставаў ды фэстываляў пэрформансу.

Прадстаўляў Беларусь на міжнародным літаратурным фэстывалі Vilenica (Славенія, 2005).

Ляўрэат прэміі Саюзу беларускіх пісьменнікаў за лепшае эсэ на тэму «Вобраз ХХІ стагодзьдзя» («Разьвітаньне з Адамам»). У складзе суполкі Бум-Бам-Літ адзначаны прэміяй Саюзу беларускіх мастакоў «За неардынарную падачу сваёй творчасьці».

Калі б Лукашэнкам быў я.

1) Стварыў бы новае шляхецкае саслоўе з усіх тых, хто сёньня размаўляе па–беларуску і мае трохі ўласнае зямлі — як мінімум, гаршчок для кветак.

3) У мэтах прымірэньня грамадзтва вынес бы на рэфэрэндум праект новай дзяржаўнай сымболікі: бел–чырвона–зялёны сьцяг, а таксама мадыфікаваны герб „Пагоня“ (замест рыцара — міліцыянэр з гумовай палкай на матацыкле).

4) Выдаў бы дэкрэт пра аб’яднаньне ўсіх палітычных партыяў у дзьве: Урадавую і Апазыцыйную (пры перамозе на выбарах Апазыцыйнай яны павінны памяняцца назовамі).

5) Калі прыйдзе час, абвясьціў бы выбары адразу ў два беларускія парлямэнты: Нацыянальны Сход і Вярхоўны Савет.

6) Прапанаваў бы рэфармаваць выбарчую сыстэму такім чынам, каб кожны чалавек меў права падаць за свайго кандыдата ад 1 да 4 галасоў, колькі хоча.

7) Прызначыў бы ўсё дарослае насельніцтва краіны сваімі віцэ–прэзыдэнтамі. Зьмяніў бы канстытуцыю такім чынам, каб усе грамадзяне па дасягненьні паўналецьця аўтаматычна прызначаліся б дэпутатамі, пасламі, міністрамі і г.д. Па ратацыі абвесьціў бы ўсенародныя выбары грамадзяніна, свабоднага ад усіх дзяржаўных пасадаў.

8) Галоўнай мэтай „беларускага шляху“ мы абярэм ператварэньне нашай дзяржавы ў сусьветны цэнтар харэаграфіі.

9) Аднавіць бы СССР у „адной асобна ўзятай“ рэспубліцы — у выглядзе фэдэратыўнай дзяржавы (падзелім Беларусь на 15 саюзных рэспублік, адпаведныя тым, што існавалі ў СССР. Магілеўская вобласьць будзе Таджыкістанам).

10) Зь іншага боку, някепска б стварыць у межах Беларусі Новую Эўропу з уласнымі Францыяй, Рымам, Радай Эўропы, швaйцарскімі банкамі і г.д.

11) Купіў бы ў Расеі Сiбір, а калі застануцца грошы — яшчэ і Каліфорнію ў ЗША.

12) Загадаў бы засеяць большасьць калгасных палёў лесам, каб пакласьці канец „бітвам за ўраджай“. Менавіта лес наша галоўнае багацьце: нашмат выгадней экспартаваць драўніну і набываць збожжа за мяжой. У лесе можна вырошчваць прафэсійных партызан на экспарт, грыбы, лекавыя зёлкі і медзьвядзёў. Пашырэньне ляснога ладу жыцьця дапаможа адрадзіць аўтэнтычную старажытную культуру.

13) Перайменаваў бы найвышэйшую Лысую гару ў пік Лукашэнкі — у гонар першага прэзыдэнта нашай краіны.

14) Заклаў бы пад усю паверхню Беларусі магутны магніт, каб прыцягваць з космасу мэтэарыты і папаўняць такім чынам дзяржаўныя запасы рэдкіх элемэнтаў. Натаўскія танкі ў выпадку вайны прыліпнуць да зямлі і ня змогуць прайсьці праз нашую тэрыторыю ў братнюю Расею.

15) Пабудаваў бы тысячу гор і цясьнінаў, каб патрыётам было дзе хавацца, а з Расеі не даходзілі арктычныя вятры.

16) Мне падабаецца праграма Субтрапічнай партыі Расеі — для пачатку яе можна было б ажыцьцявіць у нас:
— Для зьмяншэньня энэргазатратнасьці эканомікі зьнізіць тэмпэратуру кіпеньня вады да 50 градусаў.
— У бананавай рэспубліцы павінны расьці бананы!
— Сярэднегадавую тэмпэратуру паветра ўсталяваць на ўзроўні 20 градусаў, можна вышэй.
— Выйсьці з СНД і ўступіць у Арганізацыю Амэрыканскіх краінаў са статусам бананавай звышдзяржавы.

17) Можна было б і перасунуць нашую зямлю бліжэй да тропікаў, каб птушкам ня трэба было кожную восень лётаць у вырай. А яшчэ лепш прыладзіць пад краіну колы і езьдзіць на ёй куды трэба ўсім разам.