ВЯСЕЛЬЛЕ: ТРАДЫЦЫІ І СУЧАСНАСЬЦЬ

РМГА «Студэнцкае Этнаграфічнае Таварыства» з 14 кастрычніка ладзіць выставу ВЯСЕЛЬЛЕ: ТРАДЫЦЫІ І СУЧАСНАСЬЦЬ у межах арт-праекту «Беларускі стыль»
Адкрыцьцё выставы 14 кастрычніка а 16:00.  На адкрыцьці будуць выступы сьпеўных гуртоў, дудовая музыка, знаёмства з беларуская вясельнай традыцыяй. Увоход вольны.
Музей традыцыйнага ручнога ткацтва Паазер’я г. Полацк, вул. Войкава, 1 (музей знаходзіцца ў цэнтры горада, калі дабірацца аўтобусам, то прыпынак – гарвыканкам, далей за помнікам Еўфрасінні Полацкай  шукайце зялёны драўляны будынак). Тэл. для даведак: + 375 214 42 30 41
Выстава працуе штодня акрамя панядзелка з 10:00 да 17:00
 
Адкрыцьце выставы адбудзецца адмыслова 14 кастрычніка – на свята Пакроў. Раней казалі, што зіма закрывае лета, а Бог пячатае зямлю пасля Пакрова, і да вясны ніхто не можа знайсці скарбаў.
На Віцебшчыне існаваў звычай пячы на свята пірог і абыходзіць з ім усе гаспадарчыя будыніны, прыкладаючы да кожнае страхі, каб буры, што пачынаюцца ад Пакрова, не разбуралі стрэхі.
З гэтага дня пачыналiся вяселлi, лiчылася, што Пакроў — спрыяльнае свята для шлюбу. У гэту вясельную пару хлопцы па вёсках выглядалі сабе нявест, а тыя напярэдадні Пакрова варажылі на замужжа. На Брэстчыне набіралі ў хвартух апалае лісце і пасля вытрасалі з прыполу — куды вецер панясе, туды і замуж ісці. У іншых мясцінах пяклі салёныя блінцы і перад сном з'ядалі, задумваючы, каб сасніўся і напаіў той, хто наканаваны лёсам. Як сцвярджала прыказка: «Ад Пакрова ўжо дзеўка гатова». З марамі пра замужжа дзяўчаты прасілі святы Пакроў пакрыць іх галаву вянком (чапцом): «Пакравы прыйдуць — дзеўцы галаву накрыюць». Калі ж вяселле на гэты раз абмінала хату, то «Праходзіць Пакрова — раве дзеўка, бы карова».
Выставу ладзіць РГМА “Студэнцкае этнаграфічнае таварыства”. Арганізацыя займаецца захаваннем, развіццём беларускай традыцыйнай культуры; а атксама папулярызацыяй каштоўнасцяў традыцыйнай культуры ў маладзёжным асяроддзі.
На выставе прадстаўлены прадметы сучасныя, аўтэнтычныя, а таксама зробленыя на замову паводле мясцовых традыцый.
Куратар і дызайнер выставы: Клепікава Святлана.
Творчая група: Сухая Наталля, Мазюк Ірына, Наста Глушко, Дзядовік Вольга.           
Выставай “Вясельле: традыцыі і сучаснасьць” хацелася  паказаць, як цудоўна і прыгожа ўжываюцца сучаснасць і старажытнасць.  Як на аснове этнаграфічнага матэрыялу цалкам магчыма стварэнне адметнага нацыянальнага стылю. Сумна глядзець на сучасныя вясельныя абрады, што згубілі свой першасны сэнс, пераняліся з замежжа (кіданне букетаў у натоўп і г. д.)

Давайце гуляць вясельле па - беларуску!
Гасцінна запрашаем у Музей традыцыйнага ручнога ткацтва Паазер’я 14 кастрычніка а 16-й гадзіне на адкрыццё!