9 самых дзіўных стыпендыяў свету

У гісторыі сусветнай адукацыі часам здаралася, што стыпендыі для самых руплівых вучняў фундавалі багатыя невукі і дурні. А стыпендыі для паслухмяных – гультаі і распуснікі. Хочацца верыць, што ў нашым выпадку ўсё было зусім не так. Такім чынам, 9 самых дзіўных стыпендыяў свету ад амерыканскага сайту Brokegradstudent.com.

1. Міжнародная студэнцкая стыпендыя «Клубу Высокіх» (Tall Clubs). Выдаецца навучэнцам, не ніжэйшым ростам за 183 см, – у выпадку хлопцаў, і за 155 см – у выпадку дзяўчат.

2. Стыпендыя маленькіх людзей Амерыкі. Ізноўку, падставаю для атрымання навучальнага гранту, ад 250 да 1000 даляраў, стане Ваш рост. Але толькі, калі Вы не вышэйшы за 122 см.

3. Стыпендыя для леўшуноў. Падобная стыпендыя, у памеры ад 1000 да 1500 даляраў, выдаецца леварукім навучэнцам Джуніята Коледж у Пенсілваніі. Стыпендыяльны фонд, у памеры 24 тыс. даляраў штогод, зафундавала былая навучэнка каледжу Мэры Фрэнсіс Берклі ў 1979 г.

4. Стыпендыя аўтару найлепшага касцюму з клейкай стужкі Умова атрымання стыпендыі ў 3 тыс. даляраў ад кампаніі Duck® Brand – выйграць у конкурсе на найлепшыя касцюмы, зробленыя з клейкае стужкі або скотчу. Усё вельмі проста – зрабі сабе і сваёй сяброўцы такі строй, дашлі фотку на адрас фірмы (якая і спецыялізуецца на разнастайных стужках падобнага кшталту) – і атрымай стыпендыю.

5. Стыпендыя за найлепшае выкананне качынага «кракання». Спаборніцтва ў імітацыі качынага «кра-кра» штогод праводзіцца ў Штутгарце, штат Арканзас. Прызавы фонд для найбольш умелых імітатараў – куртка і стыпендыя ў 1,5 тыс даляраў.

6. Стыпендыя фонду Эванса для «кедды». У гольфе словам «кедды» традыцыйна называюць хлопчыкаў, што дапамагаюць на полі асноўным гульцам. За тое, што Вы згодныя бегаць па ўсім полі за гульцом, цягаючы ягоныя клюшкі, Фонд Эванса дазваляе Вам бясплатна вучыцца ў ягонай спартовай школе, аплочвае жытло і яшчэ нават дае грошай на выдаткі.

7. Конкурс найлепшых эсэ інстытуту Айн Рэнд. Малавядомая па-за межамі Амерыкі, хаця і народжаная ў Расеі, дама-філосаф Айн Рэнд яшчэ пры жыцці добра паклапацілася, каб ейныя опусы не былі забытыя нашчадкамі. І падмацавала цікаўнасць да сваёй філасофіі саліднай прэміяй – кожны старшакласнік у ЗША можа прадэманстраваць сваю абазнанасць у працах Рэнд, напісаўшы эсэ пра ейную творчасць – і выйграць стыпендыю ў 10 тыс даляраў.

8. Стыпендыя амерыканскае нацыянальнае праграмы кандытарскіх тэхналогіяў. Гэты навучальны грант прызначаны выключна студэнтам хімічных, біялагічных ды тэхналагічных факультэтаў. Цікаўнасць да кулінарыі ў навучэнцаў прастымуляваная ў межах праграмы 5-ю тысячамі даляраў стыпендыі.

9. Стыпендыі носьбітам пэўных прозвішчаў. У падобныя латэрэі гуляюцца ў розных амерыканскіх навучальных установах. Прыкладам, наяўнасць у абітурыента прозвішча Zolp дае яму права бясплатна навучацца ў чыкагскім універсітэце Лаёлы – але толькі пры ўмове, што малады чалавек – веруючы. А вось тэхаскі A&M University гасцінна расчыняе дзверы бясплатнае навукі носьбітам прозвішча Scarpinato.

Паводле Brokegradstudent.com